Şriftin ölçüsü :

Saytın rəngi :

İcra Hakimiyyəti
Qaynar xətt: (+994 24)205-01-02 : 205-19-55

Azərbaycanın gənc muğam ifaçıları Qəbələ festivalının tamaşaçılarına unudulmaz anlar yaşadıblar.

04 avqust 2018 | 04:00

Heydər Əliyev Fondunun möhtəşəm layihələrindən biri olan Beynəlxalq Musiqi Festivalı qədim Qəbələ şəhərində uğurla davam edir. Festivalının proqramına daxil olan, tamaşaçıların və şəhərin qonaqlarının böyük səbirsizliklə gözlədikləri muğam axşamı nəhayət, reallaşdı. Avqustun 2-də axşam saat 21-də Heydər Əliyev Konqres Mərkəzinin qarşısında quraşdırılan açıq səhnədə Azərbaycanın tanınmış gənc muğam ifaçıları möhtəşəm ifaları ilə buraya toplaşan iki minə yaxın tamaşaçıya unudulmaz musiqi bayramı bəxş etdilər. Konsertdə Heydər Əliyev Fondunun təşkil etdiyi “Muğam-Televiziya Müsabiqəsi-2007”də ikinci yerə layiq görülən xanəndə Abgül Mirzəliyevin ifasında “Mahur” təsnifi və “Heydər babaya salam” mahnısı, 2011-ci ildə keçirilən müsabiqənin qalibi Səbinə Ərəblinin ifasında “Bayatı Şiraz” təsnifi və “Olmaz-olmaz” xalq mahnısı, həmin müsabiqədə ikinci yeri tutan Kamilə Nəbiyevanın ifasında Cahangir Cahangirovun “Qara gözlər” və Əfrasiyab Bədəlbəylinin Məmməd Səid Ordubadinin “Dumanlı Təbriz” pyesi üçün yazdığı “Qönçələb” mahnıları, xanəndələrin birlikdə ifa etdikləri “Qarabağ şikəstəsi”, Əməkdar artist, tarzən Sahib Paşazadənin rəhbərlik etdiyi instrumental ansamblın ifasında “Çahargah” rəngi tamaşaçılar tərəfindən alqışlarla qarşılandı. İstedadlı gənc muğam ifaçılarını Əməkdar artistlər - kamançada Toğrul Əsədullayev, qanunda Çinarə Heydərova, nağarada Emin Cəbrayılov, balabanda Azad Əliməmmədov, udda Səfa Kərimov müşayiət ediblər. Festivalın proqramına uyğun olaraq, avqustun 3-də tamaşaçılara Üzeyir Hacıbəyli adına Bakı Musiqi Akademiyasının kamera orkestrinin, Budapeşt Gypsy Band və “Qaytağı” ansamblının konsertləri təqdim olunacaq.

Keçidlər